Nagdesisyon ang Land Transportation Franchising and Regulatory Board (LTFRB) na dagdagan ang bilang ng mga Public Utility Bus (PUB) units na bibigyan ng Special Permit tuwing special holiday gaya ng Pasko at Holy Week.
Kasunod ito ng inilabas na Memorandum Circular 2023-024 ng LTFRB na nag-aamyenda sa Memorandum Circular 2015-008 at Board Resolution No. 052, Series of 2018.
Tugon rin ito sa inilapit na hinaing ng mga bus operator nang makipagdayologo kamakailan kay LTFRB Chair Teofilo Guadiz III.
Sa ilalim nito, mula sa dating 25%, ay i-aakyat na sa 30% ang kabuuang bilang ng bus units na papayagang makakuha ng Special Permit tuwing special holiday.
Ayon kay LTFRB Chair Guadiz, sa tulong ng mga karagdagang bus units, mas maraming pasahero na ang may katiyakan nang makaluwas sa kani-kanilang mga probinsya.
Bukod dito, papalawigin rin ng hanggang sa 14 na taon ang year model ng mga bus unit na papayagang bigyan ng Special Permit, mula sa dating 10 taon lamang.
“Special holidays such as Christmas and Holy Week are important holidays that allow many Filipinos to go home even for a few days so that they can reunite with their families, loved ones and friends in the celebration or observation of these dates,” pahayag ni LTFRB Chairperson Atty. Teofilo Guadiz III.
Magiging epektibo ang naturang memorandum mula Aug. 14, 2023. | ulat ni Merry Ann Bastasa
