Kailangang imbestigahan ng Senate Blue Ribbon Committee ang mga kwestiyonableng reclamation projects sa Manila Bay ayon kay Senador JV Ejercito.
Giit ng deputy majority leader, kabilang sa mga dapat pagtuunan ng pansin ang papel ng Philippine Reclamation Authority (PRA) sa mga proyektong ito.
Ipinunto kasi ni Ejercito na ang PRA ang siyang may awtoridad na makipagnegosasyon at mag-apruba ng mga reclamation projects.
Kaya naman ipinagtataka aniya ng senador kung bakit ipinagkatiwala ng PRA sa mga local government units (LGUs) ang reclamation sa Manila Bay.
Itinuturing pa naman aniyang isang national asset ang Manila Bay.
Kinuwestiyon rin ng mambabatas ang tila minadaling isakatuparan ang mga reclamation projects sa Manila Bay bago matapos ang termino ni dating Pangulong Rodrigo Duterte.
Nais rin ni Ejercito na matukoy sa imbestigasyon kung nakonsulta ba ang Department of Public Works and Highways (DPWH) at Metro Manila Development Authority (MMDA) sa mga proyekto para malaman kung may maayos na engineering plan ang mga ito. | ulat ni Nimfa Mae Asuncion
