Ibinahagi ni Speaker Martin Romualdez ang roadmap na gagamitin ng Pilipinas upang maging mabilis ang pag-unlad ng ekonomiya sa mga mambabatas mula sa iba’t ibang bansang kasapi ng Association of Southeast Asian Nations (ASEAN).
Sa kanyang talumpati sa plenary session ng 44th AIPA (ASEAN Inter-Parliamentary Assembly) general assembly, sinabi ni Speaker Romualdez na nakatuon ang roadmap sa paglikha ng mapapasukang trabaho at oportunidad na kumita ang mga Pilipino.
Binigyan-diin din ng House leader ang mahalagang papel na ginagampanan ng Kongreso upang makamit ng Marcos Jr. administration ang hangarin na ito.
“Following the lead of President Ferdinand Marcos, Jr., we have adopted a Medium-Term Fiscal Strategy that aims to support economic recovery while ensuring fiscal sustainability. Together with the Executive, we have focused on creating more job opportunities for Filipinos and improving their employability. Productivity-enhancing investments have been promoted while exercising prudence in fiscal management,” sabi ni Romualdez.
Isa rin sa ibinida ng House leader ang inaprubahang Maharlika Investment Fund bill na makatutulong umano upang mapondohan ang malalaking proyekto ng gobyerno ng hindi ginagamit ang budget ng national government.
Kinilala rin ni Speaker Romualdez ang AIPA bilang isang epektibong plataporma sa pakikipagdayalogo ng iba’t ibang parliyamento gaya ng diplomacy, equal partnership, mutual respect at benefit. | ulat ni Kathleen Jean Forbes
