Nanawagan si Senadora Pia Cayetano sa National Economic Development Authority (NEDA) na tugunan ang problema sa kakulangan ng mga healthcare professionals sa Pilipinas.
Ginawa ng mambabatas ang pahayag sa briefing sa Senado ng Development Budget Coordination Committee (DBCC) para sa panukalang 2024 national budget.
Ayon sa senadora, ang isyung ito ay mayroong seryosong implikasyon sa pagpapanatili ng healthcare system ng Pilipinas.
Ipinunto ni Cayetano na bukod sa mga nurse ay nagkukulang na rin ang bansa sa mga pharmacists, physical therapists, occupational therapists, at iba pa.
Iminumungkahi ng mambabatas na pangunahan ng NEDA ang pagresolba sa problemang ito at tulungan nito ang Commission on Higher Education (CHED), Department of Health (DOH) at iba pang ahensya sa pagtugon sa isyu.
Binigyang diin rin ni Cayetano ang kahalagahan sa pagsuporta sa mga hakbang na makakatulong na maging sustainable ang mga komunidad gaya ng pagkakaroon ng access sa malinis na tubig, maayos na kalusugan at nutrisyon at food security. | ulat ni Nimfa Mae Asuncion
