Sang-ayon si Senate President Juan Miguel Zubiri na dapat irefurbish o ayusin ang BRP Sierra Madre.
Ayon kay Zubiri, ito ay hindi lang para mapaalis ang mga bully mula sa norte kundi para na rin maprotektahan ang ating mga militar mula sa anumang posibleng kalamidad na tumama sa naturang lugar.
Sinabi pa ng Senate leader na handa ang Senado na maglaan ng pondo para dito kung hihingin ito ng Sandatahang Lakas.
Giit ng senador, nararapat lang na paglaanan ng suporta ang ating mga sundalo na nagsasakripisyo para sa ating bansa.
Matatandaang una nang iginiit ni Pangulong Ferdinand R. Marcos Jr. na walang kasunduan ang Pilipinas sa China na alisin ang BRP Sierra Madre sa Ayungin Shoal, taliwas sa claim ng China. | ulat ni Nimfa Mae Asuncion
