Kumpiyansa si Senate President Juan Miguel Zubiri na makakakuha pa ang Pilipinas ng dagdag na suporta mula sa mas marami pang mga bansa, bunsod ng inilabas na bagong 10-dash line map ng China.
Ayon kay Zubiri, talagang nakakagulat ang hakbang na ito ng China.
Ipinunto ng senate president, na bukod sa Pilipinas ay apektado rin at tila sinakop ng China sa kanilang 10-dash line map ang bahagi ng teritoryo ng India, Indonesia, Malaysia at Vietnam.
Kaya naman naniniwala ang senador, na sa bagong hakbang na ito ng China ay mas mapapatibay ang suporta para sa arbitral ruling na hindi kumikilala sa 9-dash line claim ng China sa West Philippine Sea.
Kaugnay nito, nangako si Zubiri na ipaprayoridad ng Mataas na Kapulungan ang pagpasa ng Philippine Maritime Zones bill.
Aniya, sisikapin ng senado na maipasa ang panukalang batas na ito bago matapos ang taon. | ulat ni Nimfa Asuncion
