Nakitaan pa rin ng volcanic smog o vog ang bulkang Taal sa Batangas.
Batay ito sa huling ulat ng Philippine Institute of Volcanology and Seismology (PHIVOLCS-DOST) ngayong umaga.
Pero kumpara sa inilabas na 4,600 na tonelada ng sulfur dioxide ng bulkang Taal noong Setyembre 21, bumaba na sa 2,730 tonelada ang ibinuga nito kahapon.
Ayon sa Phivolcs, nananatili pa rin ang upwelling ng hot volcanic fluids sa main crater na lumikha ng plumes na abot sa 1,800 meters ang taas.
Napadpad ito sa Hilagang-Silangang bahagi ng bulkan.
Sa nakalipas na 24 oras, walang naitalang volcanic earthquake sa bulkan.
Paalala ng Phivolcs, nananatili pa ring nasa alert level 1 ang estado ng bulkan at hindi isinasantabi ang magkaroon ng steam driven o phreatic o gas drive explosions. | ulat ni Rey Ferrer
