Pinuri ni Cagayan de Oro City 2nd District Rep. Rufus Rodriguez ang desisyon ng Department of Justice (DOJ) na suspindihin muna ang dagdag na requirement para sa mga Pilipino na bibiyahe patungong ibang bansa.
Ayon kay Rodriguez, ang desisyong ito ng DOJ na siyang namumuno sa Inter-Agency Council Against Trafficking (IACAT), ay magpro-protekta sa karapatan ng mga Pilipino na makabiyahe gayundin ay gagarantiya sa kanilang ‘right to privacy’.
“The decision protects our citizens’ right to travel, which is guaranteed by the Constitution, and their right to privacy, which is safeguarded under the Data Privacy Act,” he said.
Matatandaan na inalmahan ni Rodriguez na dating nagsilbing immigration commissioner noong Estrada administration ang bagong travel requirements dahil aniya sa abalang idudulot ng dagdag requirement gaya ng patunay sa financial capacity.
Maliban pa aniya ito sa mas mailalapit lang ang mga pasahero sa harassment at extortion.
Una nang sinabi ng IACAT na ang pagbabago sa travel requirements ay para masawata ang human trafficking. | ulat ni Kathleen Jean Forbes
