Bukas ang House Committee on Appropriations na aralin ang suhestiyon ni Ombudsman Samuel Martires na alisin na ang probisyon sa ilalim ng General Appropriations Act (GAA), ukol sa paglalathala ng “audit observations” ng Commission on Audit (COA).
Ayon kay Ako Bicol Party-list Representative Elizaldy Co, Chair ng komite, aaralin nila ang magiging epekto at implikasyon ng hiling ng Ombusdman.
Batid aniya ni Co ang concern ni Ombudsman Martires kaugnay sa premature judgement at kalituhan sa pagbabasa ng naturang audit reports, lalo na rin sa posibleng epekto nito sa reputasyon ng mga opisyal
Sa naging budget briefing noon ng kamara, hiniling ng Ombudsman na tanggalin na ang special provisions hinggil sa pagpa-publish ng audit observation memorandum na nagdudulot lang aniya ng kalituhan at pagdududa sa ahensya, na ino-audit at maging sa Ombudsman. | ulat ni Kathleen Forbes
