Makasisiguro na ngayon ang mga beteranong may kapansanan na mayroon silang sapat na benepisyong magagamit para sa kanilang pangangailangan at pagpapagamot matapos lagdaan ni Pangulong Ferdinand R. Marcos Jr. ang RA 11958 o Rationalization ng disability pension ng mga beterano.
Ayon kay Speaker Martin Romualdez, sa batas na ito, ang mga beterano na nagkaroon ng kapansanan o karamdaman sa kanilang pagseserbisyo ay magkakaroon na ng tiyak at mas mataas na benepisyo.
Hindi lamang aniya ito hakbang para kilalanin ang kanilang sakripisyo para sa bayan ngunit pagtitiyak ng pamahalaan na kaisa at kabalikat nila ang gobyerno kahit sa pagtatapos ng kanilang serbisyo.
“This significant step ensures that disabled veterans will not only receive the recognition they deserve but also gain the financial support they need to lead fulfilling lives, free from the economic burden of their disabilities. It is a reaffirmation of our commitment to our heroes, demonstrating that we stand with them, providing the means for a more secure and dignified future,” ani Speaker Romualdez.
Sa ilalim ng bagong batas, mula sa kasalukuyang disability pension rate na ₱1,000 hanggang ₱1,700 ay itinaas ito sa ₱4,500 hanggang ₱10,000.
Katumbas ito ng 350% hanggang 488% na pagtaas.
“Thus, a more substantial disability pension ensures that veterans and their dependents have a reliable source of income to cover daily living expenses, healthcare costs, and other essential needs. A higher disability pension provides them with the financial means to access the necessary medical treatment, adaptive equipment, and support services to improve their quality of life,” sabi pa ng House leader.
Maliban dito, nakapaloob din sa bagong batas na oras na umabot sa edad na 70 ang isang beterano ay ituturing na itong ‘disabled’ at bibigyan ng buwanang pension na ₱1,700. | ulat ni Kathleen Jean Forbes
