Nagpalipas ng magdamag sa mga evacuation center sa lungsod Quezon ang maraming pamilya dahil sa pagtaas ng tubig baha sa kanilang lugar dulot ng malakas na ulan.
Sa ulat ng Quezon City LGU, napilitang ilikas ang 605 pamilya o 1,528 indibidwal mula sa mga barangay ng Roxas, Damayang Lagi, Bagumbuhay, Quirino 2A, Mangga at Barangay Tatalon dahil sa pagbaha.
Pinakamaraming inilikas ay mula sa Barangay Tatalon na may 275 pamilya o 868 indibidwal sunod ang
Barangay Mangga na may 183 pamilya.
Bukod dito, abot din hanggang baywang ang tubig sa ilang bahagi ng barangay Kamuning.
May ulat ding natanggap ang Quezon City DRRMO na taong nalunod sa Barangay Bagong Lipunan.
Ngayong umaga, muling ipagpapatuloy ng QC Urban Search and Rescue team ang kanilang operasyon para hanapin ang sinasabing nalunod na indibidwal. | ulat ni Rey Ferrer
