Aprubado na sa committee level ng Senado ang panukalang batas na magpapalawak ng batayan ng dissolution of marriage, kung saan papayagan na ang absolute divorce sa Pilipinas.
Naglabas na ng committee report ang Senate Committee on Women, Children, Family Relations and Gender quality para sa Senate Bill 2443.
Kabilang sa mga may-akda ng panukala sina Senator Risa Hontiveros, Sen. Raffy Tulfo, Sen. Robin Padilla, Sen. Pia Cayetano at Sen. Imee Marcos.
Lumagda rin sa committee report sina Senador JV Ejercito, Minority eader Koko Pimentel, Senate President Pro Tempore Loren Legarda, at Sen. Grace Poe.
Sa ilalim ng panukala, pinatitiyak sa estado na ang magiging pagdinig sa diborsyo ay magiging abot-kaya, mabilis at hindi magastos lalo na para sa mga mahihirap nating kababayan.
Itinatakda nito, na ang mag-asawa o isa sa mag-asawa ang maaaring maghain ng petisyon para sa diborsyo at sakaling maaprubahan ay babalik sa single status ang parehong partido.
Kabilang sa mga maaaring ground for divorce sa ilalim ng paukala ay:
– Kung limang taon nang hiwalay ang mag-asawa;
– Kung may ginawang krimen na rape ang respondent-spouse laban sa petitioner-spouse bago o
pagkatapos ng kanilang kasal; at
– Kung hindi maayos ang pagsasama o hindi magkasundo ang mag-asawa matapos nilang dumaan sa 60
days cooling off period
Itinatakda rin ng panukala, na ang petisyon na ihahain ng mag-asawa ay dapat na may kasamang joint plan para sa parenthood na magtatakda ng suporta, kustodiya at living arrangements para sa kanilang mga anak. | ulat ni Nimfa Asuncion
