Binigyang diin ni Senador Francis Tolentino na labag sa international law ang paglalagay ng China ng floating barriers sa Bajo De Masinloc o Scarborough Shoal kaya dapat itong maalis kaagad.
Ayon kay Tolentino, ang Pilipinas lang ang pwedeng maglagay ng ganitong palatandaan kung merong oil spill o bahagi ng aquaculture management bilang temporary measure.
Pinunto ng senador na ang Bajo De Masinloc ay 120 nautical miles lamang ang layo mula sa Zambales at ang mga mangingisdang Pilipino ay hindi dapat pahirapan ng China na mangisda sa sarili nating bakuran.
Iginiit naman ni Senadora Risa Hontiveros na hindi dapat pumayag ang Pilipinas na harangan ng China ang ating mga mangingisda sa sarili nating karagatan.
Tiwala si Hontiveros na makakayang i-escort ng Philippine Coast Guard (PCG) ang ating mga mangingisda at matitiyak na makakalagpas sila sa floating barriers na inilatag ng China.
Muli ring nananawagan ang senadora sa kasalukuyang administrasyon na suriin ang national policy ng bansa pagdating sa China.
Hindi na aniya tayo dapat pumayag na hindi mapaparusahan ang ganitong mga aksyon. | ulat ni Nimfa Asuncion
