Ipinanawagan ni Vice President at Education Secretary Sara Duterte ang muling paghubog sa edukasyon at pagtanggap ng mga bagong teknolohiya para mapahusay ang kasalukuyang landscape ng edukasyon sa buong mundo.
Ginawa ito ng Pangalawang Pangulo sa kanyang talumpati sa 2023 Global Education and Innovation Summit (GEIS) noong Huwebes.
Kinilala ni VP at Sec Sara, na siya ring kasalukuyang Southeast Asian Ministers of Education Organization (SEAMEO) Council President, ang napipintong pagbabago ng teknolohiya habang lumalabas ang Artificial Intelligence (AI).
Kanyang iminungkahi ang tatlong (3) puntos upang matiyak na mananatiling epektibong sandata ang teknolohiya na makakatulong sa edukasyon.
Sinabi niyang ang kritikal na pag-iisip, komunikasyon, pakikipagtulungan, at pagkamalikhain ay dapat isaalang-alang bago gamitin ang teknolohiya.
Giit pa nito, ang pangangailangang tumugon sa mga epekto ng teknolohiya sa mga sistemang pang-edukasyon at ang mga ministro ang dapat sumubaybay sa mga teknolohiyang ito.
Panghuli, binigyang-diin niya na ang kakayahang umangkop at pagpapanatili ng bagong teknolohiya sa sistema ng edukasyon ay dapat pag-aralan ng mga end user bago ang pagpapatupad para sa kapakinabangan ng mga stakeholder. | ulat ni Rey Ferrer
