Kinumpirma mismo ni Department of Foreign Affairs (DFA) Secretary Enrique Manalo ang pagkasawi ng dalawang Pilipino kasunod ng pag-atake ng rebeldeng Hamas sa bansang Israel.
Sa kaniyang “X” post, sinabi ni Manalo na mariing kinukondena ng Pilipinas ang nagpapatuloy na gulo sa Israel na nagresulta sa pagkasawi ng mga kababayang Pilipino roon.
Kasunod nito, sinabi ni Manalo na handa ang Pilipinas na tumulong sa iba pang mga bansa para sa pagtatamo ng pangmatagalang kapayapaan sa lugar alinsunod na rin sa prinsipyo ng UN Securtiy Council Resolutions.
Dagdag pa ni Manalo, patuloy ding aalalay ang Pamahalaang Pilipinas sa mga kababayang naiipit sa gulo sa mga bansang Israel gayundin sa Palestine. | ulat ni Jaymark Dagala
