Muling pinaalalahanan ng Commission on Elections (COMELEC) ang mga mangangampanya para sa paparating na Barangay and Sangguniang Kabataan Elections (BSKE) na bawal maglagay, magdikit, o magpaskil ng mga campaign materials sa panahon ng kampanya mula October 19-28, 2023.
Ayon sa COMELEC, ang mga sumusunod na lugar ay hindi dapat gamitin ng mga kandidato para sa kanilang pangangampanya:
* Mga publicly owned electronic announcement boards katulad ng LED display board, LCD monitor, at iba pa na pagmamay-ari ng pamahalaan
* Mga sasakyang pagmamay-ari ng gobyerno katulad ng patrol car, ambulansya, at iba pang sasakyan partikular na ang may government license plates
* Mga public transport vehicles na pagmamay-ari at kontrolado ng pamahalaan katulad ng MRT, LRT, PNR, at iba pang klase ng pampublikong transportasyon
* Waiting shed, sidewalk, street at lamp post, electric post, traffic sign, pedestrian overpass at underpass, flyover at underpass, tulay, lansangan, center island sa kalsada at highway
* Paaralan, public shrines, barangay hall, opisina o tanggapan ng pamahalaan, health center, pampublikong istraktura o gusali
* Mga public transport terminals na pagmamay-ari at kontrolado ng pamahalaan tulad ng bus terminal, airport, seaport, dock, pier, train station at iba pang katulad nito
Ang mga kandidato ay dapat maglagay, magkabit, o magpaskil lamang ng legal na campaign materials sa designated common poster areas at private property na may pahintulot ng may-ari.
Nagpaalala rin ang COMELEC na ang pamimigay, pag-aalok, o pangangako ng pera o anumang bagay na may halaga para sa sinumang tao para hikayatin na bumoto para o laban sa isang kandidato ay lumalabag sa batas at gumagawa ng election offense na vote-buying.
Para sa common posting areas sa inyong lugar, maaaring bumisita sa COMELEC Facebook page o website para sa talaan ng mga pinapayagang lugar. | ulat ni EJ Lazaro
