Nagdesisyon ang House Committee on Transportation na hindi na palalabasin ang dating executive assistant ni suspended Land Transportation Franchising and Regulatory Board (LTFRB) Chair Teofilo Guadiz III na si Jefferson Tumbado para bumoto ngayong araw sa Barangay at Sangguniang Kabataan Elections.
Matatandaan na noong October 23 ay ipina-contempt ng House Committee on Transportation si Tumbado at kasalukuyang nakadetine sa Kamara.
Ayon kay Antipolo Representative Romeo Acop, kinausap niya ang House Sergeant-at-Arms na kung nanaisin ni Tumbado na bumoto ay escortan ito papuntang Olongapo.
Ngunit ini-wave na aniya nito ang kaniyang ‘right to vote.’
“So inorderan ko yung Sergeant-at-Arms na kung pupwede, if he decides to exercise his right to vote, escortan siya sa Olongapo. Ngayon ang report sakin nung kuwan…I think he decided to waive his right to vote,” sabi ni Acop.
Una na ring nagpadala ng liham si Bulacan Representative Salvador Pleyto kay Acop para hilingin na pagbigyan si Tumbado na makalabas ng isang araw para bumoto.
Sampung araw na pagkakakulong sa Kamara ang ipinataw na parusa kay Tumbado o hanggang November 2. | ulat ni Kathleen Jean Forbes
