Nakatakdang iuwi bukas sa Pilipinas ang labi ng isa sa mga nasawing overseas Filipino workers (OFWs) sa nagpapatuloy na giyera sa Israel.
Ayon kay Migrant Workers Undersecretary Maria Antonette Allones, inaasahang darating bukas ng alas-4 ng hapon ang labi ng babaeng caregiver mula Israel.
Samantala, na-cremate na ang labi ng isa pang OFW na nasawi at kasalukuyang nasa pangangalaga ng kaniyang asawa na nasa Israel din.
Wala pang ibang detalye ang Department of Migrant Workers (DMW) kung kailan maiuuwi ang labi ng iba pang mga Pilipino na nasawi sa naturang bansa.
Matatandaang kinumpirma ng Department of Foreign Affairs (DFA) na umabot na sa apat na mga Pilipino ang nasawi sa Israel dahil sa nagpapatuloy na gulo roon. | ulat ni Diane Angela Lear
