Nakatakdang iuwi bukas sa Pilipinas ang labi ng isa sa mga nasawing overseas Filipino workers na nasawi sa nagpapatuloy na giyera sa Israel.
Ayon kay Migrant Workers Undersecretary Maria Antonette Allones, inaasahang darating bukas sa bansa ng alas-4 ng hapon ang labi ng babaeng caregiver na nasawi sa naturang bansa.
Samantala, na-cremate naman na ang labi ng isa pang OFW na nasawi at kasalukuyang nasa pangangalaga na ng kaniyang asawa na nasa Israel din.
Wala pang ibang detalye ang Department of Migrant Workers kung kailan maiuuwi ang labi ng iba pang mga Pilipino na nasawi sa naturang bansa.
Matatandaang kinumpirma ng Department of Foreign Affairs na umabot na sa apat na mga Pilipino ang nasawi sa Israel dahil sa nagpapatuloy na gulo roon. | via Diane Lear
