Aabot na sa 179 power interruptions ang naitala ng Power Task Force Election 2023 ng National Electrification Administration.
Ayon sa NEA, mula ito sa ulat ng 57 mula sa 91 electric cooperatives (ECs) na nakaranas ng interruption simula 7:00 P.M. kagabi hanggang kaninang 5:00 AM.
Nagtagal ng halos isang oras ang mga naitalang power interruptions na ito.
Kaugnay nito, tuloy-tuloy na aniya ang power restoration activities ng limang electric coop kabilang ang Cebu 3 Electric Cooperative (CEBECO III), Central Pangasinan Electric Cooperative (CENPELCO), Masbate Electric Cooperative (MASELCO), Occidental Mindoro Electric Cooperative, Inc. (OMECO), at Palawan Electric Cooperative o PALECO.
Una nang pinagana ng NEA ang 24-hour power situation monitoring system nito upang masiguro ang matatag na suplay ng kuryente sa panahon ng halalan.
Alinsunod ito sa direktiba ng COMELEC kung saan naatasan ang NEA na maghatid ng stable at walang patid na nationwide electric power requirement mula sa simula ng botohan, sa pagtatapos ng bilangan hanggang sa proklamasyon ng mga nanalong kandidato. | ulat ni Merry Ann Bastasa
