Inaprubahan na ng Land Transportation Franchising and Regulatory Board (LTFRB) ang P1 provisional fare increase, na hirit para sa traditional public utility jeepneys (PUJs) at modern jeepneys sa buong bansa.
Sa katatapos na pagdinig, sinabi ni LTFRB Chairperson Teofilo Guadiz, magiging epektibo ang dagdag na P1 taas-pasahe simula sa Linggo Oktubre 8.
Kaugnay nito, hindi pa nakapagdesisyon ang LTFRB sa isa pa nilang kahilingan na P5 fare increase.
Sinabi ni Guadiz, na magkakaroon pa uli ng pagdinig sa Nobyembre 7, 2023.
Giit niyang malabo pang pagbigyan ang kanilang kahilingan tungkol dito, dahil marami pang dapat isaalang-alang ang LTFRB.
Kailangan pa ang masusing pag-aaral at madinig ang iba’t ibang sektor bago magdesisyon.
Nakapaloob sa petisyon ng PASANG MASDA, ACTO at ALTODAP, na humirit sila ng P5 fare increase sa unang apat na kilometro at P1 sa bawat susunod na kilometro. | ulat ni Rey Ferrer
