Umapela si Senador Mark Villar sa pamahalaan ng Pilipinas na gawin ang lahat ng paraan para matiyak ang kaligtasan ng mga Pilipinong naiipit sa giyera sa pagitan ng Israel at ng Palestinian militant group na Hamas.
Ginawa ng senador ang pahayag matapos itaas ng ating Department of Foreign Affairs (DFA) ang Alert Level 4 sa Israel at Gaza Strip na nangangahulugan ng mandatory evacuation para sa mga Pilipino sa naturang lugar.
Binigyang diin ni Villar na dapat iprayoridad ang pagtulong sa mga Pilipino sa Israel at Gaza at huwag silang pabayaan.
Kaya naman hinimok ng senador ang pamahalaan na gamitin ang lahat ng available nating resources para mahanap ang mga nawawalang Pilipino at ligtas na mapauwi dito sa Pilipinas ang lahat ng apektadong Pinoy.
Gayundin ang gamitin ang lahat ng available diplomatic channels para mapalaya ang mga dinukot na Pilipino.
Nanawagan rin si Senator Mark sa mga Pilipino sa Gaza na iprayoridad ang kanilang kaligtasan. | ulat ni Nimfa Mae Asuncion
