Personal na ipinaabot ni Vice President at Education Secretary Sara Duterte ang taos-pusong pakikiramay sa pamahalaan ng Israel na ngayo’y humaharap sa matinding krisis buhat sa banta ng Hamas at Hezbollah.
Ito’y makaraang magsagawa ng courtesy call sa Pangalawang Pangulo si Israel Ambassador to the Philippines Ilan Fluss sa Pasig City.
Sa isang pahayag, sinabi ni VP Sara na kaniyang pinasalamatan ang Israel sa pagkilala nito sa tapang at katatagan ng mga Pilipino na nasawi gayundin sa tulong na ipinaabot ng naturang bansa sa mga naulilang pamilya.
Kasunod nito, tiniyak din ni VP Sara kay Ambassador Fluss ang pakikiisa ng Pilipinas sa paghahanap ng solusyon upang makamit ang ganap na kapayapaan, lalo’t mga inosente ang nagiging biktima partikular na ang mga bata.
Natalakay din sa pulong ng dalawang opisyal ang pagtutulungan ng Pilipinas at Israel, para sa pagpapalago ng edukasyon gayundin ang pagsuporta sa mga repormang isinusulong ng Education Department. | ulat ni Jaymark Dagala
