Lumutang ang dalawang saksi na nakakita sa missing beauty queen na si Catherine Camelon habang duguan sa loob ng isang sasakyan.
Ayon sa Criminal Investigation and Detection Group o CIDG ng Philippine National Police, kahapon ay lumantad sa kanila ang dalawang saksi at mayroon na rin silang sinumpaang salaysay.
Kasabay nito ay positibo ring kinilala ng dalawang saksi ang person of interest sa pagkawala ni Camilon na isang pulis.
Ayon sa salaysay, nakita nila ang pulis na POI sa isang subdivision noong gabi na mismong nawala si Catherine.
Nasaksihan din nila ang duguang biktima na inililipat mula sa kanyang sasakyan patungo sa isa pang sasakyan.
May dalawa hanggang tatlong kasama ang pulis na POI at ang personal driver nito.
Ayon pa sa dalawang saksi, tinutukan sila ng baril ng mga kasamahan ng POI.
Samantala, batay sa nagpapatuloy na imbestigasyon ng CIDG, kinumpirma nilang may relasyon si Camilon at ang pulis na POI.
Ang anggulong ito rin ang posibleng dahilan ng pagkawala ng beauty queen. | ulat ni Mae Formaran | RP1 Lucena
