Naglunsad ng Humanitarian Assistance and Disaster Response (HADR) operations ang Armed Forces of the Philippines (AFP) Visayas Command (VISCOM) sa gitna ng pagbaha sa ilang lugar sa Eastern at Northern Samar.
Ayon kay VISCOM Commander Lieutenant General Benedict Arevalo, 28 HADR Teams ang idineploy para magsagawa ng pre-emptive evacuation, search and rescue, road-clearing operations, at paghahatid ng mga relief goods.
Kabilang dito ang HADR Teams ng 803rd Infantry Brigade sa ilalim ng Joint Task Force Storm na nakapagligtas ng 50 pamilya o 312 na mga indibidwal sa Catarman, Samar.
Ang HADR Teams naman ng 3rd Infantry Battalion at 19th Infantry Battalion katuwang ang local Disaster Risk Reduction and Management Office ang nagsagawa ng pre-emptive evacuation sa mga apektadong residente ng Las Navas at Pambujan sa Northern Samar.
Habang ang HADR Teams ng 43rd Infantry Battalion ang nagsagawa ng road-clearing operations sa Catarman at Mondragon, Northern Samar, at namahagi ng ayuda sa mga apektadong residente. | ulat ni Leo Sarne
📸: VISCOM
