Malakas na lindol ang tumama sa lungsod ng Davao at karatig probinsya at rehiyon ngayong hapon kung saan base sa Phivolcs, nasa magnitude 7.2 ang kalakasan nito at sentro ng lindol ang Sarangani Davao Occidental.
Kaugnay nito, isang crane sa tuktok ng itinatayong gusali ng 28 storey Paragon Place sa Sandawa, Matina, Davao City ang bumigay at nahulog mula sa building.
Wala namang naitalang casualty sa nasabing insidente subalit isang bahay ang nahulugan ng malaking debris na tumagos mismo sa loob ng isang bahay malapit sa Paragon place.
Tinatayang 9 na kabahayan ang malapit sa Paragon Place kung saan ilan dito ay boarding houses na sa ngayon ay nasa evacuation center ng Barangay 76-A Bucana ang mahigit kumulang na 50 katao.
Samantala, patuloy ang pagdatingan ng mga karagdagang responder mula sa Task Force Davao upang tiyakin na ligtas lahat ng mga residente roon at tutulong sa pagsasagawa ng inspeksyon sa naturang gusali. | ulat ni Mariecel Dasalla
