Ibinahagi ni Speaker Martin Romualdez, co-chair ng 31st Asia Pacific Parliamentary Forum na masaya ang mga delegasyon ng 18 bansang nakikibahagi ngayon sa pulong sa preparasyon ng bansa.
Aniya, mahalagang maiparamdam ng Pilipinas ang mainit na pagtanggap sa kanila dahil ito ang mga opisyal na gumagawa ng mga polisiya at batas sa kani-kanilang mga bansa na maaaring pakinabangan ng Pilipinas.
Kung makikita aniya nila ang maayos na paghahanda ng bansa bilang host country para sa pulong ay mas mahihikayat sila na bumisita muli sa Pilipinas na makatutulong sa turismo at dagdag oportunidad para makakuha ng investors.
“Pero sa totoo lang tumataas yung kumpiyansa ng ating mga delegasyon galing sa mga ibayong dagat na puwede silang magsabi “come to the Philippines, not just for tourism, not just for imvestment, not just for education not just for cultural pero for all facets of a relationship.”, pagbabahagi ni Romualdez sa isang press briefing.
Katunayan, ilan aniya sa mga delegado ang nais makatikim ng balut, durian at lambanog.
Habang ang iba, nais bumalik sa Pilipinas para magbakasyon kasama ang kanilang mga pamilya.
Ang APPF ang ‘APEC’ ng mga parliamentarian sa buong Asia Pacific Region.
Maliban sa mga mga pulong, inaasahan din na magkakaroon ng courtesy call ang ilan sa heads of delegation sa House Speaker tulad ng Vietnan, Canada, Russia, Cambodia, Japan, Malaysia at Chile. | ulat ni Kathleen Jean Forbes
