Mariing itinanggi ng Energy Regulatory Commission (ERC) na may sabwatan sila ng Manila Electric Company o MERALCO.
Ito ang tugon ng ERC sa batikos ni Laguna Representative Dan Fernandez sa umano’y sabwatan ng ERC at MERALCO dahil sa kabiguang ibalik ng power distributor sa mga konsyumer ang sobrang nasingil nito.
Magugunitang sa privilege speech sa Kamara, sinabi ni Fernandez na bukod sa hindi pagre-refund ay masyadong mataas ang weighted average cost of capital (WACC) ng MERALCO na ipinapasa sa kanilang mga customers.
Depensa naman ng MERALCO, hindi naman nila kontrolado ang paniningil ng WACC dahil ito anila ay bahagi ng Regulatory Function.
Kaya naman sinabi ng mambabatas na kailangang imbestigahan ang ERC at MERALCO dahil hindi nila itinataguyod ang karapatan at kapakanan ng mga consumer.
Ayon kay ERC Chairperson Monalisa Dimalanta, handa naman silang humarap sa imbestigasyon para ipaliwanag ang kanilang panig. | ulat ni Jaymark Dagala
