Nagsagawa ng consultative meeting si Agriculture Secretary Francisco Tiu Laurel, Jr. sa mga local chief executive ng top 10 rice-producing provinces sa bansa.
Ayon sa DA, pangunahing tinalakay sa pulong ang mga hakbang para maiangat ang grain supply sa bansa, at mabawasan ang pag-iimport ng bigas.
Napag-usapan din ang mga istratehiya para mapababa ang presyo ng bigas sa merkado.
Kabilang sa mga dumalo rito sina Cagayan Governor Manuel Mamba, Nueva Ecija Gov. Aurelio Umali, Isabela Governor Rodolfo Albano III, Pangasinan Governor Ramon Guico III, Maguindanao del Sur Governor Bai Mariam Mangudadatu, Bukidnon Governor Rogelio Neil Roque, Tarlac Governor Susan Yap at Camarines Sur Governor Luigi Villafuerte.
Sa tala ng DA, kumakatawan ang 10 probinsya sa 48% ng kabuuang rice production sa bansa.
Welcome naman para sa mga gobernador ang inisyatibo ni Sec. Laurel na anila ay isang magandang hakbang tungo sa hangaring mapalago ang rice production.
Una nang nag-commit si Sec. Laurel na pupulungin ang lahat ng mga stakeholder bilang bahagi ng direktiba ni Pangulong Marcos Jr. sa pagsusulong ng modernisasyon sa agri sector at food security sa bansa. | ulat ni Merry Ann Bastasa
