Tinitimbang pa ng Metropolitan Manila Development Authority (MMDA) kung mayroon nang pangangailangan na alisin ang window hours ng Unified Vehicle Volume Reduction Scheme o Number Coding.
Ito’y dahil sa inaasahan nang bibigat ang daloy ng trapiko ngayong papalapit na ang Kapaskuhan.
Ayon kay MMDA Acting Chairperson, Atty. Don Artes, kailangan nilang pag-aralang maigi ang sitwasyon ng trapiko lalo’t prayoridad nilang maibsan ang mabigat na daloy ng trapiko lalo na tuwing rush hour.
Pero sa mungkahi ng Lawyers for Commuters Safety and Protection na i-urong sa alas-8 hanggang alas-10 ng umaga at alas-6 hanggang alas-8 ng gabi ang number coding, tila malamig dito si Artes.
Giit niya, layunin ng kasalukuyang oras ng number coding na maibsan ang pagdagsa ng mga motorista tuwing rush hour kaya’t kung babaguhin ito ay hindi masusunod ang layunin ng naturang patakaran. | ulat ni Jaymark Dagala
