Hindi pa nagtatakda muli ang Land Transportation Franchising and Regulatory Board (LTFRB) ng petsa kung kailan muling didinggin ang hirit na ₱5 taas-pasahe sa jeep ng transport groups.
Ayon kay LTFRB Chairperson Teofilo Guadiz III, hinihintay pa ng board na ma-stabilize ang presyo ng produktong petrolyo lalo’t ito ang pangunahing kinukonsidera tuwing may fare hike petition.
Sa ngayon, pabago-bago pa kasi aniya ang presyo ng produktong petrolyo.
Sa oras naman na magtuloy-tuloy ang pagbaba sa presyo ng langis hanggang Disyembre ay maaaring magsagawa na ng pagdinig hinggil sa hirit na taas-pasahe.
Sa ngayon, ₱1 provisional increase pa lamang ang inaprubahan ng LTFRB sa pampasaherong jeep. | ulat ni Merry Ann Bastasa
