Umusad na sa Kamara ang panukala para bigyang access ang mga Pilipino sa mas abot kayang funeral service, kasama ang kabaong.
Ito’y matapos pagtibayin ng House Committee on Trade and Industry ang House Bill 102 o Affordable Casket Act ni Deputy Speaker at Cebu 5th District Representative Duke Frasco.
Ipinunto ng mambabatas, halos sing mahal na rin ng gastos habang nabubuhay ang gastos kapag namatayan.
Kaya naman malaking pasakit ito, lalo na sa mga mahihirap na pamilya.
“In the Philippines, the cost of dying has become a burden akin to the challenges of living. Many Filipinos are born in poverty, and unfortunately, they often pass away in similar circumstances. With steep funeral and burial costs, one can only imagine the painful experience that grief-stricken Filipino families go through when facing not only the loss of their loved ones, but also the financial burden brought about by high-costs funeral expenses,” sabi ni Frasco.
Sakaling maisabatas ang panukala, pinatitiyak na mayroon disenteng kabaong na ibinebenta ang mga funeral parlor at funeral service na hindi lalagpas ng ₱20,000 ang presyo.
Kung ang isang mahirap na pamilya ay walang aabutang murang kabaong, ibibigay ng funeral establishment ang mas mahal na kabaong pero ang presyo na babayaran ay hindi lalagpas sa ₱20,000 kasama na ang funeral service.
Ang mga lalabag ay pagmumultahin ng hindi hihigit sa ₱200,000 at masususpendi ang license to operate ng hanggang anim na buwan.
Sakaling umulit, papatawan ito ng multa na hindi hihigit sa ₱400,000 at aalisan na ng lisensya.
“Regulating the sale of caskets and funeral expenses will greatly relieve grief-stricken families of the added financial burden, and preserve the human dignity of our fellow Filipinos, both in life and in death,” dagdag ni Frasco. | ulat ni Kathleen Jean Forbes
