Nailigtas ng mga kawani ng Philippine Coast Guard (PCG) at Philippine National Police Maritime Group (PNP MARIG) ang 17 Vietnamese crew ng isang Vietnamese cargo vessel na nagsimulang lumubog sa karagatang sakop ng Balabac Palawan kagabi, November 21, 2023.
Lulan ng cargo vessel na VIET HAI STAR, ang nasa 4,000 tonelada ng bigas nang sumadaad ito malapit sa pier ng Balabac.
Narating ng PCG at PNP MARG ang kinaroroonan ng cargo vessel bandang 9:45 ng gabi matapos matanggap ang ulat ukol dito.
Pasado alas singko na ngayong umaga nang makarating ang SAR Team kasama ang 17 crew sa pantalan ng Balabac matapos na i-monitor pa ang sitwasyon ng nasabing cargo vessel.| ulat ni Lyzl Pilapil| RP1 Palawan
