Hindi pagpapatuloy ng dating naudlot na usapang pangkapayapaan ang napagkasunduang peace negotiations sa pagitan ng pamahalaan at National Democratic Front, bagkus ito ay panibagong simula.
Ito ang binigyang diin ni Office of the Presidential Adviser for Peace Reconciliation and Unity (OPAPRU) Secretary Carlito Galvez Jr. sa kanyang mensahe sa Leadership Summit ng Armed Forces of the Philippines (AFP) sa Mabalacat City, Pampanga.
Ayon kay Galvez, malinaw ang intensyon ng gobyerno na makinig, makipag-usap, at unawain ang buong saklaw ng armadong pakikibaka para makamit ang “principled” at patas na resolusyon sa lahat ng isyu.
Tiniyak ni Galvez na lahat ng partidong may kinalaman sa nakatakdang usapang pangkapayapaan ay kukunsultahin upang makabuo ng framework para sa gagawing negosasyon.
Nilinaw naman ni Galvez na magpapatuloy ang lahat ng mga kasalukuyang programa at security operations ng pamahalaan hanggang sa makabuo ng pinal na kasunduan. | ulat ni Leo Sarne
