Nanguna ang tatlong alkalde sa National Capital Region (NCR) sa mga local chief executives na may pinakamataas na job approval rating batay sa survey ng HKPH Public Opinion and Research Center, kasama ang Asia Research Center na nakabase sa Hong Kong.
Kabilang dito si Malabon Mayor Jeannie Sandoval na may 89.7% rating, Quezon City Mayor Joy Belmonte na may 89.5% rating at Parañaque Mayor Eric Olivarez na nakakuha ng 89.2%.
Magkahanay naman sa ikalawang pwesto sina Pasig Mayor Vico Sotto (87.5%) at Navotas Mayor John Rey Tiangco (86.8%).
Sinundan ito nina Makati Mayor Abigail Binay (85.3%), Mandaluyong Mayor Benjamin Abalos Sr. (84.1%), at nina Manila Mayor Honey Lacuna (82.6%) at Pasay Mayor Emi Calixto-Rubiano na kapwa (81.7%).
Ayon kay Steven Su, survey direktor, nakatuon ang naturang job approval rating sa pamumuno at pamamahala, kahusayan ng mga alkalde sa paggawa ng desisyon, transparency, at accountability.
Sinuri rin dito ang pagpapatupad ng mga alkalde ng mga programa sa iba’t ibang sektor kabilang ang pabahay, kalikasan, at transportasyon.
Isinagawa ang survey mula November 3 to 10, kung saan aabot sa 1,200 ang lumahok. | ulat ni Merry Ann Bastasa
