Magco-convene na ang Senate Committee on Ethics and Privileges para imbestigahan ang sinsabing pag-leak ng impomasyon sa mga napag-usapan sa ginawang all-senators caucus nitong Lunes, ika-6 ng Nobyembre.
Ayon kay Committee Chairperson Sen. Nancy Binay, ito ay bilang pagsunod sa naging utos ni Senate President Juan Miguel Zubiri matapos umalma ang mga senador sa isang news article na nagsasabing walo hanggang siyam na senador ang nagsusulong na ibalik ang confidential fund ng Office of the Vice President at ng Department of Education na kapwa pinamumunuan ni Vice President Sara Duterte.
Paliwanag ni Binay, alinsunod sa Section 126 ng Rules of the Senate, ang mga executive session ng Senado ay isinasagawa nang ‘closed door’ at tanging ang Senate Secretary, Sergeant-at-Arms, at mga taong awtorisado lamang ang papayagang dumalo.
Habang nakasaad naman sa Section 128 na pinagbabawalan ang sinuman na ilabas ang mga napag-usapan sa executive session na itinuturing na confidential.
Ayon kay Binay, ilulunsad nila ang imbestigasyon para makakalap ng mga dagdag na impormasyon sa leakage at para maprotektahan ang integridad at reputasyon ng mataas na kapulugan.
Gayunpaman, hindi na magbibigay ng dagdag na impormasyon ang kumite para na rin sa confidentiality ng paglilitis. | ulat ni Nimfa Asuncion
