Bumubuti ang kalidad ng trabaho para sa mga Pilipino at ang underemployment rate sa bansa ayon sa Department of Finance (DOF).
Ito ang reaction ng DOF matapos muling bumaba ang unemployment rate o bilang ng mga walang trabaho sa bansa kumpara noong nakaraang taon.
Base sa pinakahuling Labor Force Participation Survey ng Philippine Statistics Authority (PSA), bumaba sa 4.5 percent ang unemployment rate nitong nakaraang buwan kumpara sa five percent noong parehas na buwan noong 2022.
Bumaba ang underemployment rate sa 10.7 porsiyento noong Setyembre 2023, ang pinakamababang bilang na naitala simula April 2005.
Ayon sa DOF, mas mababa pa ito kumpara sa pre-pandemic level na 14.8 percent at ang 15.4 percent na naitala noong Setyembre 2022 gayundin sa 11.7 percent noong August 2023.
Ayon kay Finance Secretary Benjamin Diokno, ito ang pinakalayunin ni Pangulong Ferdinand R. Marcos, Jr. na bawasan ang kawalan ng trabaho sa apat hanggang limang porsiyento sa 2028.
Sa ngayon, ang year-to-date na unemployment rate ay nasa 4.6 porsiyento, mas mababa sa 5.3 hanggang 6.4 porsiyento na target para sa 2023. | ulat ni Melany Valdoz Reyes
