Kinumpirma ng Manila International Airport Authority (MIAA) ang pagdating sa bansa ngayong araw ni Timor-Leste President Jose Ramos-Horta.
Ito’y bilang tugon na rin sa paanyaya ni Pangulong Ferdinand R. Marcos Jr. sa Timor-Leste Leader nang kapwa nila daluhan ang 42nd ASEAN Summit sa Indonesia noong Mayo.
Batay sa abiso ng MIAA, lalapag mamayang hapon sa Ninoy Aquino International Airport (NAIA) ang Royal Brunei flight sakay ang Timor-Leste Leader.
Inaasahang sasalubungin si Pres. Ramos-Horta ng mga matataas na opisyal ng bansa sa pangunguna nila Foreign Affairs Secretary Enrique Manalo at iba pang miyembro ng Gabinete.
Una nang sinabi ng Presidential Communications Office na ang pagdating sa bansa ni Ramos-Horta ay inaasahang makapagpapatibay sa relasyon ng Pilipinas at Timor-Leste. | ulat ni Jaymark Dagala
đŸ“¸: ramoshorta.com
