Inumpisahan na ng Department of Health (DOH) ang pag-uulat nito ng mga biktima kaugnay ng paggamit ng mga ilegal na paputok kasabay ng papalapit na pagsalubong ng Pasko at Bagong Taon.
Sa ulat ng ahensya, apat na bata na may edad 6 hanggang 13 ang naging unang report na biktima ng mga ipinagbabawal na paputok kabilang ang boga, 5-star, at piccolo.
Sa pahayag ng DOH, binigyang diin nito ang pangangailangan ng kolektibong aksyon upang mawakasan ang paggamit ng mga nasabing paputok at hinikayat ang mga magulang, lokal na awtoridad na magkaisa laban dito.
Nauna nang ipinahayag ni Department of the Interior and Local Government (DILG) Secretary Benhur Abalos ang kagustuhan nitong ipagbawal na ang mga paputok sa mga komunidad sa buong bansa at magkaroon na lamang ng fireworks display ang mga lokal na pamahalaan upang maiwasan ang mga firecracker related injury tulad nito. | ulat ni EJ Lazaro