Isinailalim na sa State of Calamity ang bayan ng Hinatuan sa lalawigan ng Surigao del Sur kasunod ng Magnitude 7.4 na lindol na naitala noong Sabado, December 2.
Ayon sa Lokal na Pamahalaan ng Hinatuan, ito ay isang hakbang upang magkaroon at maibigay ang kagyat na pangangailangan ng mga naapektuhang komunidad.
Mula sa huling ulat ng Hinatuan Municipal Disaster Risk Reduction and Management Office, umabot na sa ₱10.5-million ang halaga ng napinsalang pampublikong istruktura, habang aabot sa ₱88.5-million ang naapektuhang pampribadong istruktura sa Hinatuan.
Ayon naman sa National Disaster Risk Reduction and Management Council (NDRRMC), nai-ulat na isang residente ang nasawi, habang nasa 12 naman ang sugatan. | ulat ni Mary Rose Rocero
