Sa patuloy na pagdagsa ng mga biyahero sa mga paliparan sanhi ng Holiday season, hinikayat ng Tourism Infrastructure and Enterprise Zone Authority (TIEZA) ang pagbabayad ng travel tax online ng mga pasaherong papalabas ng bansa.
Ito ang naging pahayag ng TIEZA, upang gawing mas maayos at mabilis ang pagcheck-in ng mga pasahero at mapaikli ang mga pila ng pagbabayad ng nasabing buwis sa mga Travel Tax Department sa NAIA Terminal 3.
Ayon sa TIEZA, nag-set-up sila ng apat na counter sa Islands B, C, D, at E para sa mga hindi pa nakakabayad ng travel tax.
Payo rin ng TIEZA na piliin ang mga counter na may pinakakaunting may nakapila para mabasawan ang paghihintay sa pagbabayad.
Para sa mga nais mag-prepay na ng kanilang travel tax online maaring bisitahin ang website ng Online Travel Tax Services System (OTTSS) ng TIEZA. | ulat ni EJ Lazaro