Dapat munang hayaan ang mga otoridad sa pag-iimbestiga ng nangyaring pambobomba sa Mindanao State University (MSU) sa Marawi City nitong Linggo.
Ito ang pahayag ni Senate Committee on Public Order and Dangerous Drugs Chairperson Ronald ‘Bato’ dela Rosa sa tanong kung iimbestigahan ba ng kanyang komite sa Senado ang naturang pangyayari.
Giit ni dela Rosa, hindi na muna dapat makialam ang Kongreso sa imbestigasyon.
Binigyang diin ng mambabatas, na mas mainam na hayaan na munang matapos ng pambansang pulisya ang kanilang criminal investigation sa insidente bago magkasa ng legislative inquiry.
Nanawagan naman si Senador Nancy Binay sa Philippine National Police at Armed Forces of the Philippines, na paigtingin ang kanilang intelligence efforts at kanilang laban kontra sa mga criminal, at mga grupong nananakot sa lipunan.
Una nang kinondena ng mga senador ang nangyaring pambobomba sa MSU, kasabay ang pakikiramay sa mga pamilya ng mga nasawi sa insidente. | ulat ni Nimfa Asuncion
