Isang sunog ang bumulabog sa mga residente sa isang residential area sa Visayan Hills Barangay Matandang Balara sa Quezon City kaninang umaga.
Sa salaysay ng mga residente, nagsimula ang sunog bago mag-alas-8 ng umaga kaya agad rin silang nagkumahog sa paglikas at pagbitbit ng mga gamit na maaaring maisalba.
Sa inisyal namang ulat ng BFP, iniakyat ang sunog sa ikalawang alarma dakong 8:22 ng umaga.
Pahirapan naman ang pag-apula ng mga tauhan ng BFP at fire volunteers sa sunog dahil sa makipot na daanan papasok sa nasusunog na residential area.
Kaugnay nito, pansamantalang isinara na muna sa mga motorista ang bahagi ng Zuzuaregi Street para magbigay daan sa mga pumapasok na fire truck.
As of 9:26am, idineklara na rin ng BFP na kontrolado ang sunog sa residential area sa Visayan Hills Brgy. Matandang Balara, Quezon City. | ulat ni Merry Ann Bastasa
