Patuloy ang pakikipag-ugnayan ng Pilipinas sa gobyerno ng Iran para mapalaya ang 18 tripolanteng Pilipino na lulan ng isang oil tanker na kinubkob kamakailan sa Gulf of Oman.
Ayon kay Department of Foreign Affairs (DFA) Undersecretary for Migrant Workers Affairs Eduardo de Vega, nakatakdang bisitahin sa darating na weekend ng Embahada ng Pilipinas sa Iran ang mga nasabing Pilipino na nasa bahagi ngayon ng Tehran.
Kaugnay nito, nilinaw ni De Vega na hindi armadong grupo kundi mismong mga tauhan pala ng Iranian Navy ang kumubkob sa oil tanker na St. Nicholas.
Aniya, may koneksyon ito sa court order ng gobyerno ng Iran dahil ang naturang barko ay ginamit noon para maghatid ng langis sa ibang bansa kahit merong export ban.
Gayunman, sinabi ni De Vega na siniguro sa kanila ng gobyerno ng Iran na agad reresolbahin ang problema dahil itinuturing nilang kaibigan ang Pilipinas.
Samantala, sa ngayon ay nasa maayos naman umanong kondisyon ang mga nabanggit na Pilipino. | ulat ni AJ Ignacio
