Ikinalugod ni House Ways and Means Committee Chair Joey Salceda ang pagkakapili kay Deputy Speaker Ralph Recto bilang bagong secretary ng Department of Finance (DOF).
Sa isang mensahe, nag-abiso ang Presidential Communications Office (PCO) na ngayong araw, January 12, nakatakdang manumpa si Recto bilang bagong kalihim ng DOF, kasama si Frederick Go na itinalaga naman kamakailan bilang Special Assistant to the President for Investment and Economic Affairs.
Ayon kay Salceda, bitbit ni Recto ang malawak nitong karanasan sa batas pang-ekonomiya at malalim na relasyon sa mga miyembro ng Kongreso na makatutulong sa pagpapatibay ng mga makabuluhang reporma upang matugunan ang gastusin, paglikha ng trabaho, at pagpapalawak sa fiscal space.
Bilang dating Ways and Means chair si Recto sa Senado, positibo si Salceda na mas mabilis nang uusad ang mga tax reform laws na nakabinbin sa Mataas na Kapulungan.
“Recto has been Chair of the Committee on Ways and Means in the Senate and was one of the authors of the 1997 Comprehensive Tax Reform Program during his tenure in the House. I am optimistic that key tax reforms pending in the Senate will also move faster with his appointment, due to his relationships in that chamber, as well as his ability to broker viable compromises,” ani Salceda. | ulat ni Kathleen Jean Forbes
