Ganap na ring ipatutupad ng Anti-Red Tape Authority sa barangay level ang Republic Act 11032, na kilala rin bilang Ease of Doing Business Law.
Layon nito na mapahusay ang bureaucratic efficiency at mapabilis ang proseso ng gobyerno.
Kasama ang Compliance Monitoring and Evaluation Office team, nagsagawa ng surprise inspection si ARTA Secretary Ernesto Perez sa Barangay Sto. Niño sa Parañaque City kamakailan.
Isinailalim sa assessment ang mga proseso ng barangay para matiyak ang pagsunod sa mga mandato ng EODB law.
Binigyang diin ng Kalihim ang pagbibigay sa kahalagahan ng mga barangay, bilang local government units na sumusunod sa mga itinatakda ng batas.
Alinsunod sa whole-of-nation approach ni Pangulong Ferdinand R. Marcos Jr.. makikipagtulungan ang ARTA sa Department of the Interior and Local Government para isulong ang ganap na pagpapatupad ng EODB law sa barangay level.
Ang inspeksyon ay sisimulan ng serye ng orientation at town hall meeting na isasagawa sa buong bansa. | ulat ni Rey Ferrer