Nakaalerto na ang Land Transportation Franchising and Regulatory Board (LTFRB) para sa ligtas na pagbiyahe ng mga pasahero sa buong bansa ngayong Semana Santa.
Mula Marso 22 hanggang Abril 11, 2024, ipinatutupad na ng LTFRB ang mahigpit na monitoring at regulasyon sa pampublikong transportasyon bilang bahagi ng Oplan Bantay-Biyahe Semana Santa 2024 ng ahensya.
Ayon kay LTFRB Chairperson Teofilo Guadiz III, nag-deploy ng mga personnel ang ahensya sa mga Complaint at Public Assistance Help Desk sa mga pampublikong terminal sa buong bansa.
Ito ay upang masigurong maayos at ligtas ang operasyon ng mga terminal, at pampublikong sasakyan.
Para sa mga nangangailangan ng tulong, maaaring makipag-ugnayan lang sa mga naka-duty na LTFRB personnel o tumawag sa 24/7 hotline sa numerong 1342.
Bukod dito, hinimok din ang publiko na manatiling updated sa mga anunsiyo at impormasyon sa opisyal na Facebook page ng LTFRB. | ulat ni Rey Ferrer
