Kasunod ng mga batikos sa guidelines ng Department of Education (DepEd) kaugnay sa pagsusuot ng alternatibong uniporme ng mga teaching at non-teaching personnel nito ngayong mainit ang panahon.
Naglabas ng paglilinaw ang DepEd na maaaring magsuot ang kanilang mga kawani ng kahit anong kulay ng collared shirt.
Hindi anila ito limitado sa kulay puti, berde, at pula gaya ng inilabas na larawan ng DepEd sa social media.
Ayon kay Education Spokesperson at Undersecretary Michael Poa, ang inilabas nilang halimbawa na damit na may kwelyo at logo ay maaari lamang pagpilian.
Aniya, pwedeng isuot ang alinmang damit na may kwelyo na ginamit sa nakalipas na DepEd events tulad ng Brigada Eskwela, Palarong Pambansa, Oplan Balik Eskwela, at iba pang aktibidad ng ahensya. | ulat ni Diane Lear
