Hinimok ni Senador Sherwin Gatchalian ang Department of Energy (DOE) na bumuo ng El Niño Task Force para makapagpatupad ng mga stop-gap measures sa gitna ng banta ng pagkakaroon ng yellow alert sa Luzon power grid ngayong tag-init.
Ayon kay Gatchalian, oras na mabuo ang task force ay dapat nang agad na magpulong ang lahat ng mga power plant at distribution utilities para makapaglatag ng contingency measures, kabilang na ang pagpapatupad ng interruptible load porgram.
Binigyang diin ng senador na mahalagang matiyak ng pamahalaan na magkakaroon ng sapat na suplay kuryente sa lahat ng oras lalo na ngayong summer months kung kailan mas mataas ang demand sa kuryente.
Hindi aniya kumbinsido ang mambabatas na hindi magkakaroon ng power shortage ngayong tag-init lalo na kung sa susunod na dalawang buwan ay papalo sa 45 degrees Celsius ang temperatura.
Pinatitiyak rin ng senador na hindi muna magkakaroon ng maintenance ang mga planta ng kuryente.
Sinabi ni Gatchalian na dapat na lang gawin ng mga planta ang kanilang maintenance sa mga buwan ng Hunyo, Hulyo at Agosto. | ulat ni Nimfa Asuncion