Sinang-ayunan ng ilang motorista ang naging pahayag ni Pangulong Ferdinand R. Marcos Jr. kaugnay sa mga sala-salabat na mga problema ng publiko sa trapiko.
Sa pag-iikot ng Radyo Pilipinas, may ilang motorista na nagsabing nauunawaan nila ang panawagan ng Pangulo na magtiyaga muna habang sinosulusyunan ang problema.
Magugunitang sa vlog ni Pangulong Marcos, kabilang sa mga problemang inilahad nito ay ang kakulangan ng imprastraktura na ngayon ay sinosolusyunan na.
Gayundin ang mga pagawain sa mga lansangan na matagal kumpunihin at kawalang disiplina ng karamihan sa mga motorista.
Umaasa naman ang mga motorista na matugunan ng pamahalaan ang pangangailangan ng bansa sa lahat ng dako hinggil sa pagbibigay solusyon sa problema ng trapiko.
At maparusahan sana ang mga hayagang lumalabag sa batas trapiko maging ang mga hindi nagpapahalaga sa kapakanan ng kapwa. | ulat ni Jaymark Dagala